رواية كامله
الدعوة كانت لسه في جيب مريلتها، والستات جوة ميتين على رواحهم من الضحك وهم بيتفقوا عليها.. مكنوش يعرفوا إن الشغالة اللي بيخططوا يخلوها مسخرة السهرة، شايلة في إيدها ملف هيهد قصورهم فوق دماغهم!
الدعوة كانت لسه في جيب مريلة ليلى لما سمعت ضحك الستات وهما بيتفقوا عليها إزاي يخلوها فرجة ومسخرة السهرة.. عبير وهي بتوطي صوتها بس مش أوي يعني قالت قوليلها تلبس فستان سواريه، وأكدي عليها عشان يبان شياكتها.. أنا نفسي أشوف اللي بتقضي يومها بتغسل الحمامات دي فاكرة الأناقة شكلها إيه!.. الضحكة اللي نزلت ورا الجملة دي طارت من شبابيك فيلا مدام إجلال الواسعة واستقرت على الرخام برة زي التراب.. ليلى كانت واقفة على بعد كام خطوة، إيديها الاتنين مكلبشين في يد المساحة، بنطلونها الجينز المبهوق مبلول من عند الركبة، وشعرها ملموم كحكة عشوائية، وفي معصم إيدها علامة حمراء من كتر لبس الجوانتي.. ما لفتش.. ومخلتهومش يلمحوا نظرة عينيها.. جوة الصالون المكيف، إجلال رفعت كاس العصير وبصت من الشباك على البنت اللي بتنضف بيتها بقالها تلات سنين وقالت فكرة عبقرية يا عبير.. نعزم الشغالة ونقولها تلبس على السنجه عشر، ونسيب المعازيم يتفرجوا على الكوميديا دي لوحدهم.. هناء ضحكت ضحكة صفرا، وسوزان فضلت تبص في ألماظ غوايشها، وعبير ساندت ضهرها لورا وهي حاسة بالانتصار.. الستات دول بيتقابلوا كل تلات، يشربوا قهوة فرنساوي ويتكلموا عن الأكابر والرحلات والجمعيات الخيرية، والناس اللي شايفينهم من دور عيالهم.. بيتكلموا عن الأذية كأنها خفة ډم، وعن كسر الخواطر كأنه تسلية.. ليلى غطست المساحة في جردل المية وعصرتها.. هي اتعلمت من زمان إن الناس اللي شايفة نفسها فوق قوي مبيعملوش حساب للغلابة اللي حواليهم.. بيتكلموا براحتهم قدام الشغالة والسواق والبواب لأنهم معتبرينهم حتة من العفش.. مبيفكروش إن وراء اليونيفورم ده عقل بيفهم، وإن البنت اللي بتمسح القهوة من على الترابيزة سامعة ووعية لكل كلمة.. يا ليلى!.. إجلال ندهت عليها.. ليلى سابت المساحة، نشفت إيدها في المريلة ودخلت الصالون نعم يا مدام إجلال؟.. إجلال فتحت شنطتها الجلد الغالية وطلعت كارت تقيل مطبوع بماء الذهب وقالت عيد ميلادي الواحد وخمسين السبت الجاي.. تلت مېت عازم، وبوفيه مفتوح ومزيكا وحاجات كدة فخمة.. وقررت أعزمك.. عبير كانت ھتموت وتضحك وهي بتداري بؤها.. ليلى أخدت الكارت وقرت الكلام تتشرف مدام إجلال الشربيني بدعوتكم لحضور حفل.. الملابس رسمية.. الساعة تمانية.. إجلال كملت بابتسامة صفرا الحفلة فورمال.. يعني لازم تهتمي بنفسك وبمظهرك شوية.. وماتنسيش تدخلي من الباب الرئيسي للفيلّا.. مش حلوة في حقك المعازيم يفتكروكي من الشغالين!.. ليلى رفعت عينيها وبصت لها بثبات غريب وقالت مفهوم.. شكراً يا مدام إجلال أنا جاية فعلاً.. لأن أعتقد إن الوقت جه.. ابتسامة إجلال اتهزت لثانية.. كانت
