قعدت 15 سنة بمسح أرضيات المكاتب وبغسل الحمامات عشان أبني بيت أحلام عيلتي

بتوتر ليه ما قلتيلناش إنك جاي؟ ضحكت وقلت عشان رجعت خلاص ومش ماشي تاني عايز بس أرتاح في أوضتي.
ساد سكون تقيل.. بعدها أمي قالت بصوت واطي في الحقيقة سالم ومراته قاعدين في اوضتك دلوقتي. ابتسمت عشان ما أحرجهمش مافيش مشكلة، هقعد مؤقتًا في أوضة الضيوف. بس سالم قاطعني مافيش أوضة ضيوف حولناها لأوضة لاولادي. وقفت لحظة أمال انا هنام فين؟ أمي ردت بارتباك واحنا معقول ننساك جهزنالك أوضة صغيرة فوق السطح كويسة ليك لحد ما تظبط أمورك.
بصلتها وأنا مش مصدق أظبط أمورك؟ الكلمة طلعت من بقّي زي السکينة اللي اتغرست في صدري. أبص لأمي، ألاقيها بتتهرب من عيني وبتعدّل في أساور الذهب اللي في إيدها الذهب اللي أنا دافع ثمنه من عرق جبيلي. أبص لسالم أخويا، ألاقيه واقف حاطط إيده في جيبه ببرود، وكأنه صاحب الملك وأنا مجرد ضيف ثقيل جاي يشحت منهم!
مسكت نفسي بالعافية، وقلت بصوت بيترعش من القهر أنا اللي باني البيت ده جنيه ب جنيه يا أمي! 15 سنة من عمري راحوا في المسح والغسيل والتعب عشان أسمع كلمة أوضة فوق السطح لحد ما تظبط أمورك؟! سالم اتكلم بقلة أدب وبصوت عالي جرى إيه يا خالد؟ هو إحنا هنذلّ بعض؟ ما كلنا تعبنا! وبعدين العيلة كبرت والبيت لازم يشيلنا، إنت جاي على تجهيز جاهز وعايز تأخد أحسن أوضة؟ ارضى باللي موجود أو اتصرف!
أمي ما دافعتش عني. وقفت ساكتة، وفي الآخر قالت بنبرة باردة كسرت قلبي أكتر من كلام سالم خالد يا ابني، أخوك فتح بيت وعنده عيال، إنت لسه لوحدك ومش محتاج أكتر من السرير اللي فوق، مش مستاهلة تكبر الموضوع وتعمل مشكلة في أول يوم ترجع
فيه!
في اللحظة دي، حسيت إن ال 15 سنة اللي اتسرقوا من عمري يتردوا في وشي قلم. طلعت الشنطة الرياضية القديمة اللي جيت بيها، وطلعت فوق السطح. كانت الأوضة عبارة عن كراكيب ومكان يغم النفس، سقفها بيخر مية مطر وريحتها تراب. قعدت على السرير الصدي، وعيطت... عيطت زي العيل الصغير، مش عشان الفلوس ولا البيت، بس عشان الغدر لما بيجي من أقرب الناس، بيهدّ الروح.
بس وهمّ قاعدين تحت فاكرين إنهم كسروني وأكلوا حقي، ما كانوش يعرفوا السر اللي أنا شايله!
تاني يوم الصبح، نزلتلهم. كانوا قاعدين بيفطروا على السفرة الرخام اللي أنا اخترتها بنفسي من القاهرة. أول ما شافوني، اتكهربوا. قعدت بكل هدوء، وبصيت لأمي ولأخويا ومراته وقلت أنا مش هجادل، ولا هعمل مشاكل... إحنا نروح للشهر العقاري ونكتب الشقق بأسامينا زي ما اتفقنا زمان، عشان كل واحد يعرف حقه.
سالم ضحك بسخرية وقال حق إيه يا معلم؟ البيت ده كله مكتوب باسم أمك ببيع وشراء رسمي، وأمي كتبت الدورين بتوع البيت باسمي أنا